ثقافة الحمد

السلام عليكم
كيف حال الجمييييع .. يارب دايما بخير وسعادة

حلو إن يكون عندنا ثقافة الحمد ..
يعنى يكون عندنا معرفة ( وليس مجرد معلومات ) عن الحمد فى حد ذاته

إيه الكلام العجيب دا !!! إنزلى بالترجمة ( حاضر )

ممكن أكون عيان وبقول الحمد لله
وممكن أكون غنى وبقول الحمد لله
وممكن أكون بعطس وبعدها أقول الحمد لله
وممكن يكون نفسى فى شيء ولسه ما حصلتش عليه .. أقول الحمد لله


*-* الحمد لله .. المراد بيها إيه ؟ .. كده بقى يبقى هنتكلم عن مظاهر الحمد
و الحمد إما معنوى أو مادى

المعنوى ..
• إنى أقول الحمد لله على شيء ما حلو أعطاه ليا ربنا ، أو شيء ما لم يصيبنى بسوء .. الحمد لله هنا كانت شكر لله على نعمته أو عدم زوال نعمته .
• الحمد لله على شيء ما صابنى بسوء .. الحمد هنا بيبقى دليل على الرضا بقضاء الله .
• الحمد لله بتظهر فى الصدقات المعنوية زى الإبتسامة الصادقة وانت بتبص فى وشوش الناس ، عيادة مريض ، صلة رحم ... .

المادى ..
• الحمد لله و الشكر فى المعاملات المادية .. يعنى أى شيء مادى ملموس ( صدقات بالأموال / إطعام مسكين / كساء محتاج / علاج مريض ....... ) أى نوع من أنواع الصدقات بداية من إماطة الطريق علشان محدش يتكعبل .. إلى أعلى نوع من أنواع الصدقات .


*-* هو ضرورى إننا نقول الحمد لله بشكل مادى مش معنوى فقط
ممممممممممممم ..
تخيل كده إنك فى يوم ربنا كرمك وفضلك على عباده ورزقك بواحدة بنت حلال وخطبتها .. مش هتعمل بقول الرسول صلى الله عليه وسلم " تهادوا تحابوا " ؟ أكيد هتهديها هدية .. طبعا مش لازم كل يوم ولا كل إسبوع ولا حتى كل شهر ولا كل موسم .. بس كل ما تحب تتقرب منها هتجيب لها هدية حتى ولو وردة علشان هى تعرف اد إيه إنت دايما فاكرها ( ودا شيء كبير ) .. ولله المثل الأعلى .. ربنا غنى عنى وعنك وعن العالمين وإنا وإنت اللى محتاجين نتقرب من ربنا ونشكره ونحمده .. من وقت للتانى نشكر بشيء مادى فعلا ( جنيه لواحد غلبان ، وجبة لواحد فقير ، تيشرت لطفل يتيم ، 50 جنيه لعيلة على اد حالهم ، علاج لواحد مريض .... ) إحنا اللى محتاجين نقرض الله قرضاً حسنا .


إسمع معايا الحديث القدسى الجاى ، وقولى هتحس بإيه من كلام ربنا
" ما من يوم تطلع شمسه إلا وتنادي السماء تقول يا رب إإذن لي أن اسقط كسفا على ابن آدم، فقد طعم خيرك ومنع شكرك. وتقول البحار يا رب إإذن لي أن اغرق ابن آدم فقد طعم خيرك ومنع شكرك. فيقول الله تعالى : دعوهم دعوهم لو خلقتموهم لرحمتوهم إنهم عبادي فإن تابوا إلي فأنا حبيبهم، وأن لم يتوبوا فأنا طبيبهم" رواه الإمام احمد بن حنبل في مسنده "


الحمد لله .. إحساس بنعم ربنا علينا
شكرا يا فلان .. إحساس بعمل كويس عمله فلان لينا
بكلمة طيبة أو هدية بسيطة تهد الجدار الكبير اللى بينك وبين اى حد


*-* الحمد لله ( قولاً ) حالات قولها كتيرة وفوائدها كتير كبيرة
بتتقال إمتى وإزاى ؟
1. فى حالة العطس .. العاطس يقول بعدها الحمد لله .
2. فى حالة حدوث مصيبة ما أو شيء مكروه .. يقول إنا لله وإنا إليه راجعون اللهم أجرنى فى مصيبتى وأخلف لى خيراً منها .
3. فى حالة رؤية مريض أو عاجز .. يقول الإنسان الحمد لله الذى عافانا مما إبتلى به غيرنا وفضلنا على كثيراً ممن خلق تفضيلا ً .
4. وغيرها ................ .

فوائدها بقى
• قال النبى صلى الله عليه و سلم (( أفضل الذكر لا إله إلا الله و أفضل الدعاء : الحمد لله )) .
• قال صلى الله عليه و سلم ايضاً )) التسبيح نصف الميزان و الحمد لله تملأ الميزان و لا إله إلا الله ليس لها دون الله حجاب حتى تخلص إليه )) .
• قال النبى صلى الله عليه و سلم (( من قال سبحان الله و بحمده فى اليوم مائه مرة حطت خطاياة و لو كانت مثل ذبد البحر )) .
• قال صلى الله عليه و سلم (( لأن أقول : سبحان الله و بحمده و الحمد لله و لا إله إلا الله و الله أكبر خير إليّ مما تطلع عليه الشمس )) .
• وغيرها ................ .

اللهم لك الحمد حمداً كثيراً طيباً يليق بجلاك وجهك وعظيم سلطانك

هل هنقدر يكون عندنا ثقافة الحمد مع الله ومع الناس بالشكل الجميل اللى نحب نعيش فيه ؟
بالله عليكم مش دا جو جميل .. إحنا محتاجين نعيشه
كل يوم وإنتوا طيبين :)