الحب .... حب بجد .... (برنامج زهور الجنة في رمضان وطول رمضان)

دايماً أسعد أيامك طول ما إنت حاسس إن حد بيحبك .. وياااااا بقى لما تتأكد إنه بيحبك بجد
طب إحساسك إيه لو عرفت إن حد بيحبك علشان مصلحته ؟
و يا ترى هتتأكد من حبه الحقيقى إزاى ؟

الحب ما يعرفش مصالح ولا مظاهر
الحب إخلاص وفعل

*-* تعالوا نشوف إحنا بنحب ربنا ليه ، وإيه المعنى الجديد اللى ممكن نحسه فى الحب دا
إحتمال كبير لما نعرف المعنى دا ونطبقه فى حياتنا مع الناس .. نعيش جو جميل بجد إحنا محتاجينه
ربنا خلق الجنة والنار .. صح
هو إحنا ما نحبش ربنا إلا علشان يدخلنا الجنة واللا علشان يعتقنا من النار ؟
كلنا هنقول لأ طبعاً ..

الأصل فى حب الله إننا بنحبه لذاته هو مش علشان مصلحة .. وييجي بعد كده السؤال والمصالح عادى
يعنى بنحب ربنا علشان قادر على كل شيء ، خالق كل شيء ، رحيم ودود كريم ، عزيز جبار .. بنحبه علشان خلقنا بشر وكرمنا على باقى المخلوقات .. بنحبه علشان منع عننا التشتت فهو إله واحد وشهد على نفسه بالوحدانية وأمره إذا أراد شيئاً أن يقول له كن فيكون .. وقدرته وسعت كل شيء مهما قعدنا نفكر ومهما إكتشفنا

تيجي المصلحة بعد كده عادى إننا بنحبه وبنحب ندعى علشان يرزقنا باللى إحنا عايزينه .. جنة ، عربية ، بيت ، شغل ، فلوس ، زوجة أو زوج ، أولاد وبنات ، أصحاب، حياة جميلة طيبة ........ وقتها مش هتكون إسمها مصلحة وقتها هتكون عبادة إسمها الدعاء ، وربنا بيحب اللى يثق فى قدرته ويدعوه وهو واثق إن ربنا قاااادر يحقق له ما يتمنى ، ولينا يوم كامل مخصوص للدعاء .. هتستمتعوا باليوم دا جدا


*-* تيجوا نشوف حديث قدسى جمييييييييل عن محبة الله...
" إذا أحب الله عبداً نادى جبريل : إنى قد أحببت فلاناً فأحبه ، قال: فينادى فى السماء ثم تنزل له المحبة فى أهل الأرض ، فذلك قول الله : [ إن الذين آمنوا وعملوا الصالحات سيجعل لهم الرحمن ودا ] ، وإذا أبغض الله عبداً نادى جبريل : إنى قد أبغضت فلاناً ، فينادى فى السماء ثم تتنزل له البغضاء فى الأرض " أخرجه الترمزى

مش إنت بردو ساعات بتلاقى ناس بتحبك وتستغرب بيحبوك ليه ؟ إبسط ياعم حبك نزل فى قلبهم من حب الله ليك

تخيلوا كده ربنا بيحب مين ؟
تقى القلب ، نقى الكفين ، لا يأتى إلى أحد بسوء ( مش بيإذى حد ) ولا يمشى بالنميمة ، تزول الجبال ولا يزول ، يحب الله ويحب كل عمل يحبه الله وبيحبب الله لعباده ( يذكرهم بالله وقدرته ) .. ربنا بيحب اللى يعين مظلوماً أو يمشى معه فى مظلمته ، ربنا بيحب المتحابين فيه ( واحد يحب واحد ف الله مش علشان مصلحة ) . يارب أرزقنا حبك وحب كل من أحبك وحب كل عمل صالح يقربنا إلى حبك .. اللهم آمبن .. وصلى اللهم وسلم على سيدنا محمد صلاة وسلاماً طيبين دائمين بدوام ملكك يا أرحم الراحمين


*-* نجيب مثال فى حياتنا ..
ست البيت زوجها بيقولها إعملى الأكل
هى ممكن تعمل الأكل علشان زوجها قالها إعمليه
وهى بردو ممكن تعمله علشان بتحبه ( زوجها يعنى )..علشان تقرب من قلبه ويحبها أكتر
حاسين الفرق فى المعنى ؟ حاسيسن الجو بينهم هيبقى جميل أد إيه ؟

هو دا الأصل من وجهة نظرى ..
أنا ممكن أصلى علشان ربنا أمرنى بالصلاة
وأنا بردو ممكن أصلى لربنا علشان أنا بحبه هو .. فبحب أعمل اللى بيقربنى منه ويحبنى أكتر
قيس على كده الصلاة والصوم والقرآن وجميع العبادات والفرائض .. حب ربنا .. هتحب تعمل اللى بيحبه
هو دا الجو الجميل اللى إحنا محتاجين نعيش فيه


*-* مين هيجاوب ...
اللى بيحب حد .. بيحبه ليه ؟
مثلا الشاب ..
إما / بحبها أصلها عسولة وشقية وفنى خالص وكوووول على الآخر وسهلة .. وبصراحة باباها غنى طحن وممكن يظبطنى بعد كده
وإما / هى أمورة و شفافة من داخلها مش خبيثة ومش بتحب الكذب ومخلصة فى حبها ليا ، بتحب أهلى ومش بتعمل مشاكل ومش حقودة ، عقلها كبير ودمها خفيف ، وبتحب تقضى حوائج الناس ، وبجد شايفها ذكية وزوجة وأم لأولادى كويسة جدا .. مش بنت فرفورة من إياهم .

مثلا البنت ..
إما / واااااااااو كوكى دا شاب روش روش روش وشيك موت يانهارى عليه.. وأجمل حاجة إن صحباتى بيموتوا من الغيظ وأنا معاه أصله بيجيب لى هدايا حلوة تجنننننن
وإما / ياعم ياعم دا بيحب الناس والناس بتحبه وبيصل رحمه وبيقضى حوائج الناس و راجل بمعنى الكلمة .. واد كده حاسس بالمسئولية وماشاء الله طموح ومش بيقف عند اى عقبة ( والعقبات كتيييييييير ) و بصراحة أكتر هو دا اللى ينفع أتجوزه ويكون أب فعلا لأولاد وبنات سكر مش عيل سيس من إياهم .

طيب اللى بيحب حد .. يبان حبه إزاى ؟
مثلاً الشاب ..
هى بصراحة بتخاف عليا ولما بأمرها بحاجة بحس إنها بتعملها علشان بتحبنى ، دا غير إنها أوقات كتير بتتود ليا من غير ما تطلب منى اى شيء ( وطبعا دا شيء نادر شوية اليومين دول ) ، دايما بتذكرنى بحاجات تقربنى من ربنا من غير ما تؤمرنى بيها أو تحسسنى أنى غلطان ، معايا دايما على الحلوة والمرة وبجد جدعة وفى نفس الوقت دلوعة.

البنت ..
أقول إيه واللا إيه .. ربنا رزقنى براجل فعلاً بيعتمد على نفسه وبيأكلنى حلال ومش بيمنع عنى شيء ومش بيهملنى ، وبيفوووت لما بياكل أكله مش تمام ، وبيحبنى علشانى أنا مش علشان هبقى أم عياله وبس ، بيإمنى فى الصلاة وبيعلمنى حاجات فى دينى ، وشعارنا جوه البيت الدلع كله وبره البيت الإحترام كله .

طبعا مش هو دا بس اللى يأكد الحب .. دا مجرد وجهة نظر
يعنى اللى يقولك انا ياعم بحب حد .. قوله ماشى
لكن هو عمل ايه علشان يبان عليه حب الحد دا بجد ؟

المواقف هى اللى بتظهر صفات الناس وبتظهرهم على حقيقتهم
سيب اللى يتكلم عن نفسه يتكلم .. لحد ما يبان الصدق فين من كلامه

طبعا الكلام دا كله نقيس عليه علاقاتنا بالأهل والأصحاب والجيران .. وما فيش مانع يكون فى مصالح مشركة بين الناس .. لكن نحاول نخلى الأصل جوانا الحب للإنسان نفسه مش حباً للمصلحة اللى بينى وبينه ( حب / إحترام / مودة / إبتسامة / دعاء .... )


*-* نصيحة منى ليك ...
حب بجد .. هتتحب بجد
حب بهزار .. هتتباع مع أول نكته
حب المصلحة .. ليك وقت وتنتهى

حاول تتعامل زى سيدنا محد رسول الله صلى الله عليه وسلم قال
" من أحب لله ، وأبغض لله ، وأعطى لله ، ومنع لله ، فقد إستكمل الإيمان " أخرجه أبو داوود


دلوقتى بقى قول من قلبك إنت بتحب ربنا ليه
وكمان ايه ممكن نعمله ظاهراً أو خفياً يقربنا من ربنا ومن الناس

كل يوم وإنتوا طيبين :)