من الفضائيات العربية.... حماده ابو دبيكى

زهقت من المشاكل فقلت أضغط عالريموت
ولاقيت بالصدفة قناة روتانا الموسيقية
أصلهم كتير والاختيار صعب شوية
طلعت علينا بت لولبية
لابسة من غير هدوم زى
ماقال الزعيم فى المسرحية
ترقص وتدلع وتتنطط
وكلها ملاغية ..
وصحيح ان انكر الاصوات ...
بس دا مينى جيب مش جلابية
وادينا نريح اعصابنا شوية
مالنا احنا ومال السياسة
والازمات الاقتصادية
موسيقى خبط ورزع
وبدأت الامورة تغنى
كلام مش مفهوم
بس مترجم للعربية
سلكت ودنى وقلت
يمكن العيب فيها
او التهاب فى الاعصاب السمعية
سمعتها بتقول تقريبا
هيك الواوا خد الواوا ...
اصل الواوا دح...شيل الواوا
حط الواوا .. خلى الواوا يصح..
احترت فى فهم الكلام
وقلت اعمل جايزة
للى يفهمه يتصل عليا
واهو يكسب ثواب فيا
ويامحلى المسابقات والضحك
على الامة المصرية
مصمصت شفايفى وقلت
الله يرحم ثومة وحليم
وفريد ويطول عمر نجاة
وفيروز والشحرورة اللبنانية
عملوا من الاغانى احساس
وعند اللزوم مدفع وبندقية
وافتكرت وطنى حبيبى
وطنى الاكبر
خلى السلاح صاحى
ياقدس ...واخيرا
حلم الامة العربية
وجت فى بالى اغنية رئيس الملكية
لا اخترناه ولا بيعناه
نجح ازاى سبحان الله
اتسدت نفسي
وسبت الريموت من ايديا
وننهى الكلام اليوم واكيد للفرجة بقية